Ik bün Fründ Hein noch mal utkamen — Een wahre Geschicht

Eine persönliche Patientengeschichte "op platt": Gerhard Schultz, Redakteur der Alster-Dorfzeitung, hat einen Herzinfarkt überlebt und seine Erfahrungen in einem kleinen Text – op Platt – geschildert. Sein wichtigster Rat: Im Zweifelsfall den Notarzt rufen!

Nüms bi uns mach geern över Fründ Hein or Jan Klapperbeen snacken.  Dorbi steiht ünner de Klock an dat Krematorium op den Ohlsdörper Karkhoff: „Eine von diesen“. Un wiss ward an een von de Stünnen Fründ Hein uns mit op uns letzte Reis nehmen. — Wo anners bi de Lüüd in Wien. För de heurt de Gevatter to dat tägliche Leben un foken heurt man de Lüüd över em snacken.

Doch nu to mien eegen Belewnis:
Dat weer in düssen Juli. As ik bi’t Fröhstück weer, harr ik op’n Stutz kolen Sweet op mien Stirn, een von de Wiesteken op eenen meuglichen Hartinfarkt.  Man anfangs geev  ik nich veel op dat Teken. Mien Fro harr een Unfall hatt un ik weer to den Doktor föhrt, um ehr een nieget Rezept to holen. Denn weer ik noch tanken fohrt. Op den Weg na Huus harr ik ümmer weller so’n komischet Gefeuhl in’t Hart, so as wenn dor een mit een stumpfen Gegenstand hen und her ruckelt. Dor hebb ik denn doch Bammel kreegen un den Notdokter över 112 anropen.

Dat duer nich lang un de RTW (Rettungswagen) mit twee Sanitäter weer dor. Een paar Minuten later keem denn de Notdoktersch mit noch een Sani. Se ünnersöchten mi, moken een EKG un leggten eenen Tropf an. De Doktorsch freug mi, wo mi dat nu geiht, wat ik freuher all för Krankheiten hatt harr un wat ik an Medikamente bruuk. Un bröchen se mi in den RTW un dat güng mit tatü-tata na’t Krankenhuus Barmbek.

Dor kreeg ik eerst eenmal een Mask vör Näs un Mund. Un denn hebbt se mi gründlich ünnersöcht, Bloot afnahmen. Sogar op Corona bün ik (negativ) test worrn. Un nu leeg ik dor in mien Bett un töv, wo dat wieder geiht. De Dokter sä to mi, dat se in dree Stünnen een tweete Blootünnerseukung maken mööt. Man he wies mi all, dat ik woll in’t Krankenhuus blieven mut. Un so keem dat. lk keem op de Kardiologie-Statschon.

Den annern Dag hebbt se mi röntgt un een Ultraschall makt. Dann keem de Dokter un sä to mi, dat ik bannig Glück hatt hebb un mi rechttidig mellt harr, anners weer dat seker to lat ween. Den annern Dag wüllt se een Katheterünnerseukung maken. Un so keem dat. Se hebbt bald twee Stünnen an mi rumdoktert un een Hartkranzgefäß, dat binah dicht weer, weller open makt un een Stent sett.

Twee Dag later bin ik denn weller na Huus kamen. lk hebb Fründ Hein noch eenmal een Nääs dreihen kunnt. Man de Dokter meen, ik harr allens richtig makt. Wenn al Lüüd rechttidig de Wiesteken beachten deen un den Notdokter ropen, ok wenn dat viellicht gar nich neudig ween weer, kunn männich Leben rett warrn.

Seite teilen: